ԱՎԱԳ ԴՊՐՈՑԱԿԱՆՆԵՐԻ ՄԱՍՆԱԳԻՏԱԿԱՆ ԿՈՂՄՆՈՐՈՇՄԱՆ ՀԻՄՆԱԽՆԴԻՐԸ

Ժամանակակից պայմաններում ավագ դպրոցականների մասնագիտական կողմնորոշման հիմնախնդիրն արդիական է և գտնվում է մասնագետ-հետազոտողների ուշադրության կենտրոնում։ Պատանին, որպես ապագա մասնագետ, փորձում է գտնել իր տեղը մասնագիտությունների շարքում՝ անցնելով գիտելիքների ձեռքբերման երկարատև ճանապարհ։ Մինչդեռ տեղեկատվության մեծ հոսքը հաճախ դժվարեցնում է ավագ դպրոցականին ինքնուրույն կողմնորոշվելու մասնագիտական ընտրության գործում։ Այս հարցում իրենց կարևոր դերակատարությունն ունեն ինչպես ընտանիքը (ծնողները), այնպես էլ դպրոցը (մասնագետ-սոցիալական մանկավարժը), որոնց արդյունավետ ուղղորդումն ու աջակցությունը ոչ միայն կօգնեն երեխային մասնագիտության ընտրության հարցում, այլև կապահովեն հասարակության՝ տնտեսական, սոցիալական, գիտական զարգացումը։